Z Festival Les Jean geit i di dritti Rundi – und zwar am 11. und 12 Mai im Auge Quartier z’Friburg. Uf dreinte Site wott z’Festival das Jahr wachse, uf der andere Site aber ganz klar sis simple aber feine Rezäpt phaute. Konzärt und anderi Verastautige i de Bars, Chäuer und Strasse mit Künschtler usder Gägend, wo ihri Ihnahme mit öine Spände mache. Francis Francis, Brassmaster Flash, Miro The Funky Man,… und Zämäarbeit mit aune Lüt usem Quartier.

 

Chlini Präsentation

Am 11. Und 12. Mai gits ir Autstadt vo Friburg wider ä Mischig us Musig, Strassekunscht, Theater und Märli. Während dene zwöi Tag wärde Künschtler und Zueschouer vom einte Bistro i dini nächschti Bar ga – vom Banshees übere Chäuer vor Spirale bis zum Soleil Blanc. Z ganze Quartier rund ume Chlin-Sankt-Johann-Platz wird mobilisiert. Z Kantonsgricht steut wider si Innehof für z’Eröffnigskonzärt zur Verfüegig, d’Gschäft häufe drbi di Freiwiuige z’verpflege und d’Restaurants sorge drfür, das niemer hungrig oder durschtig blibt.

Z’Festival Les Jean gits sit 2016. Sis Komitee het di perfekti Müglechkeit gse, das Quartier und sini Gschäft, Restaurants und Bars aber o d’Friburger Musigszene zum Läbe z’bringe. Üses Programm zeigt vor auem Künschtler vo hie, oder vo nid so wit wäg und söu es nöigierigs und härzlechs Publikum vo jung bis aut bis spät id Nacht ungerhaute. Es grosses Merci a aui Ort wo Konzärt, Theater und anders wiukomme heisse!

Offeni Bühni
für chlini und grossi Ching

Tröimsch du drvo nöime angers z singe aus unger dr Duschi? De si di fougende Infos für di! Z’Festival Les Jean bietet Ching d’Müglechkeit ufere für si gmachte Bühni ihri musikalische Talänt vorzsteue.
We du auso – allei oder mit dine Fründe – wosch cho Musig mache de chum am 12. Mai zwüsche 13:30 und 16:00 id Spirale und gniess mit üs ä unvergässleche Namitag.

Das Jahr wird dä Event vom Zäntrum für soziokulturelli Animation (REPER) und zwöi Bewohner vom Quartier gführt.

13:30 – 14:30
Karaoké ohni Amäudig – du chasch – allei oder mit dine Fründe – dini Lieblingslieder cho vorsinge, ganz nach dine Vorstellige.

15:00 – 16:00
Konzärt mit Voramäudig – du bisch dr Star. Schrib di i und chum dis musikalische Talänt cho zeige, allei, mit Band oder ei, zwöi Kollege – ganz wi du wosch.
Amäudig für Bac à stars
Schrib üs bis zum 26. April: cas.basse-ville@reper-fr.ch. Wenn mir z’viu Amäudige bechöme, de dörfe die erschte igschribene ufträte und jedi gruppe darf nur öpis vorzeige.